Afrikaanse Tokkel: Sommer ‘n tjommeltjie

Suster Tina praat mos van “tjommeltjies,” hierdie is sommer een!

Nadat ek Hester se stuk gelees het oor haar moegheid en die vlug na Rebusfontein vir die naweek het ek besluit om ook ‘n stuiwer in die Rebus beurs te gooi.

Ek mis ook die lekker gesellige verkeer so op FB met al sy dinge daar in ons spesiale kokon van totale “bliss” as ek dit so kan noem.

Vanoggend aan die einde van my oggend lopie gesels ek met my eende tannie(sy is heelwat jonger as ek) Hierdie jaar het sy dit reggekry om ses Paradise Ducks kleintjies groot te kry. Hul is op die oomblik opgeskote amper tieners. Hul vlieg nog nie regtig nie maar klap en sprei die vlerke om te toets vir die opstyg en wegvlieg. Dis heerlik om met so ‘n mens soos die eende tannie te gesels. Haar koppie raas ‘n bietjie maar dit pla my nie. Ek kuier bo-oor haar herhalings en sommige onwaarhede. Trompie, ewe rustig, lê in my skaduwee en wag dat ons verder kan loop.

Eintlik wou ek kla maar na die lekker kuiertjie het my gemoed weer opgestyg.

Ek het so n paar dae terug, nadat ek van my plaassittery gekom het, my een toon teen my bed se pootjie gestamp. Hoekom hul pootjies in die middel van die bed se sykant sit verstaan ek gladnie. Ewenwel, eers het ek nie veel gevoel tot ek my loop geloop het. My toon is gevoelig. By nadere ondersoek blyk dit dat ek die arme toon oopgestamp het. Gister sit ek toe n pleister op. Dis heel gevoelig en onplesierig om te loop met die ou toon.

Kry ek  nou die dag ‘n brief in die pos wat my aanmaan om my bestuurslisensie te hernu. Ongelooflik, ek het die lisensie al tien jaar! Ek weet ook dat van 75 daar elke vyf jaar hernu moet word en dat mens ‘n dokters verslag moet indien. Wel, ek word hierdie jaar eers 74. Ek hoop toe dat ek dit nog kan doen sonder dr verslag(nie dat dit ‘n probleem is om een te kry nie) Ek vul die vorm in. Eers moes ek vir Bertus laat weet om my selfoon se no te stuur want dis ‘n nuwe foon en daar is nog geen kontaknommers op nie.

Eers moes ek in die wagkamertjie sit totdat iemand my kan help. Nou moet jul weet, die kamertjie is waar ouens sit en wag dat hul motors getoets word vir hul “Warrant of fitness.” What a smell! Of iemand het veel uie geëet of knoffel maar die klank in die kamertjie was oorweldigend. 

Die dame roep my en vra vir my dr brief. Ek sê toe maar ek word nou eers 74. Goed, sy moes toe eers bel om te hoor wat sy moet doen. Raai wat? Sy hernu die lisensie net vir een jaar en dan volgende jaar moet ek weer aansoek doen en al die dokters goete ook laat doen. Dis nou bloeddruk, medikasie en wat ook al alles. Gelukkig toets hul jou oë sommer by die lisensiekantoor; volgende jaar moet dit ‘n behoorlike oogtoets wees.

Volgende klagte: 

Van Donderdagaand af wil my Freeview nie werk nie. Alles probeer waarvan ek weet. Boeta gevra en hy het tipies soos dit is al die vrae gevra wat ek reeds probeer het. Sug, gelukkig kan ek darem Netflix kyk wat ek toe ook gisteraand gedoen het.

 Die volgende maak my sielsongelukkig.

Ek het ‘n nuwe laptop. Die ding gee my elke keer probleme. Nes ek lekker op spoed is dan Whap hy uit. Soms moet ek ure wag voordat hy weer gefix is. Die error word telkens gefix. Nou wonder ek vir hoe lank dit so kan aanhou. Boeta het al kom kyk en weer kom kyk. Natuurlik brom hy oor goet wat ek aflaai. Ek weet in die heel begin het ek in my onnoselheid verkeerde plekke ingegaan(die gedurige advertensies wat hul so tussen al die goed gooi gee my grys hare) Boeta het alles skoon gemaak. Dit gaan steeds aan.

Die rekenaar maak my wiele pap. As ek ernstig besig is met my nuwe boekdeel dan kom daar telkens onderbrekings. Gelukkig sit dit my nie te veel af nie en begin ek telkens weer en gaan aan tot dit opbreek. 

Dan het ek gister met my naaste buurman gesels. Hy het sy werk bedank en hul beplan om die huis te verkoop en Christchurch toe te trek. Goed, hul is meestal nooit tuis nie maar tog steeds ‘n aanspraak vir my. Ook in ‘n noodgeval het hul my al gehelp.

Nou ja, al uitweg is om maar bietjie weg te breek Rebusfontein toe vir die naweek.

Sal maar op my besem klim en begin vlieg want iemand het nooit die vuurpyl teruggestuur nie. Sal die vuurpyl maar langs die pad kry.

Sien jou daar Hester en wie ook al daar is. Hou asseblief ‘n bietjie sop vir my ook.
Groetnis van huis tot huis.

NS: Ek wou n foto plaas maar my nuwe foon se proppie is anders as my oue sn. Sal nou eers ‘n koord moet gaan koop. Kannie wen nie.