Dit is weer Donderdag en tyd vir n volgende onderwerp of tema vir TOEKA-TOKKEL.
Elke Donderdag gee ek n woord of twee as prikkel om gedagtes te laat rol en ontwikkel in n lekker stukkie geskryf in AFRIKAANS. Almal is altyd WELKOM om deel te hê aan die prêt en lekker van gedagtes neerskryf.
Net n versoek:
1. Noem my pos in jou skrywe en gee n skakel hierheen sodat almal kan uitvind waaroor dit gaan.
2. Laat my weet van jou pos deur jou skakel in my kommentaar te plak. Ek wil graag erkenning gee aan jou deelname en ook lees wat jy geskryf het.
3. Geniet dit, niemand kan met jou stry nie, Afrikaans is lekker om te gebruik.
Die volgende ouens het lekker geskryf oor die woord HUIS:
Lewies Mymer het lekker in kommentaar vertel hoe hy nou in n kleiner huis bly; besoek hom gerus
Toorts in haar ou plaashuis – te heerlik met ou meubels
https://toortsie.wordpress.com/2015/05/04/jou-huis/
Vinkenverse het in n ou groot krakerige huis (met moontlike gestorwenes) gebly
Net Ekke het haar groot huis en tuin vaarwel gesê n Balkonplek gekry
Kameel het regtig n spesiale pienk kamer net reg gehad toe dit nodig was
https://toortsie.wordpress.com/2015/05/05/die-huis-met-die-pienk-kamer/
Herriemerrie wat tog op die einde n plekkie het om na huistoe te gaan
Olga het ook n onthou van eerste ou huisie met blou…
Ek hoop ek het almal nou genoem. As ek jou oorgeslaan het laat my net weet asb.
Hier kom my stukkie oor vandag/die week se tema!
OUERS VRA…
Ouers vra is nie perde koop nie!
Ouers vra is vir my n pragtige ou tradisie. Ek hoop nie dit sterf ooit uit nie. Dit maak die familie-lewe baie interessant.
As kinders moes daar altyd aan ouers gevra word of hul maar kan gaan speel by n maatjie. Of vra om kafee toe te gaan of om iets te koop.
Vra is vry en vry is lekker is daar altyd gesê. My ma het ook altyd gesê: Nee het jy en ja kan jy kry as jy vra.
Dit net ter inleiding.
Ek was in my jong lewe al n gesoute oujongnooi van 34 toe die troukoors my gepak het. My aanstaande man was ook alreeds 42 en tweekeer getroud! (Ook gesout in trou moet ek byvoeg – grappie) Hy het besluit dat hy gaan ouers vra voordat ons trou. Nou moet jul mooi besef – hierdie vrou het nog steeds gedienstig haar ouers se opdragte en leefwyse as enigste beskou. My pa was nie n ou wat mens, volgens my, sonder handskoene moes aanpak nie.
Afspraak vir besoek is gemaak.
Ons is toe vir die dag na my ouers toe. Netjies gestewel en gespoor.
Sit ons ewe kierts regop. My aanstaande vra toe die vraag en daar kom die vrae wat ouers seker maar vra as hul dogter se hand gevra word.
“Kan jy vir haar sorg?”…. “Ja, oom, beslis!”
“Het jy vaste werk?”…… “Ja, oom, permanent aangestel as senior!”
“Hoef sy nie te werk as jul getroud is( verdien jy genoeg) ?”
Hoe meer my pa vra hoe rustiger raak my geliefde en hoe meer sit my pa op die punt van die stoel!
“Waar gaan julle bly?”…. “Op die oomblik eers in n Park home, Oom”
Nou moet ek sê my pa het nog n goeie Hollandse aksent en my aanstaande hoor nie so goed nie! Hul het maar gesukkel om by mekaar uit te kom.
Op die ou end was my pa tevrede en het ingestem tot die huwelik mits ons buite gemeenskap van goedere trou.
Sjoe mense as ek nou daaraan dink sweet ek sommer want ek was maar altyd skrikkerig vir my pa.
Die volgende het net voordat my seun sou trou gebeur:
Die tweetjies is spesiaal na haar ouers om ouers te vra. My seun het gesê hy voel maar op sy senuwees. Die klomp skoonfamilie praat vreeslik baie, as hul eenmaal begin stop hul gladnie.
My seun vertel my toe hul weer terug is dat hy geen kat se kans gehad het om te vra nie tot hul aan eettafel sit en hy uit die bloute oor die geselsendes vra: “Oom en Tannie mag ek maar met jul dogter trou?”
STILTE daal neer en toe gons dit verder.
Volgend week is dit
MUSIEK….