Die wêreld verander teen ‘n vinnige spoed, ons kleinkinders word met ‘n selfoon en tablet in die hande groot. Hulle draai ‘n kraan oop, kry lopende water, sit ‘n skakelaar aan en daar is elektrisiteit. Sit ‘n TV aan en kyk ‘n storie. En dink selfs oumas is, soos Steve Hofmeyr oor spoke sing, so bietjie dom as ons nie so vinnig met die tegnologie is nie. Maar, daar is baie wat hulle nie weet nie, want ons oumas was ook kinders. En ons kan stories vertel …
‘n Bundel kinderstories uit die pen van die Goue Vroue.
Kliek op hierdie skakel om die ander stories te lees.
https://fresh.inlinkz.com/p/d9a4e9bae6aa4e179beee4acc3690247
Sommer net ‘n storietjie uit die pen van Scrapy.
Eendag was daar ‘n uitgebreide familie meerkatte wat in die Kalahari gebly het.
Mamma en Pappa Meertjie is baie lief vir hul kinders. Gelukkig is daar ook Oom en tannie Meertjie, pappa se broer en sy vrou.
Boeta is n seuntjie meerkat wat net n klein bietjie ouer as Sussa sy sussie is. Die twee geniet die lewe om en naby hul ruim meerkat huis. Die groot mense het gesorg dat hul huis baie veilig uitgelê is. As hul by een deur ingaan en daar kom gevaar is daar ten minste nog twee ander deure waardeur hul kan ontsnap.
Dis ‘n heerlike koel oggend. Al die ouers en volwassenes en kinders is buite.
Pappa Meertjie sit kierts regop eenkant met sy voorbeentjies langs sy sye. Hy snuif die vars lug.
Mamma Meertjie is nog besig om die laaste babas te voer. Hul slurp lekker aan haar warm melkies. Die groter meerkatjies voel heel op hul gemak want Pappa en oom Meertjie sal mos waarsku as daar moeilikheid kom.
Boeta skreeu: “Jy kan my nie raak nie!”. Hy raak aan Sareltjie wat baie jonger as hy is en hol weg. Sareltjie hardloop so vinnig, sy beentjies raak skaars grond.
Sussa is besig om klien Miempie se hare uit te kam. Sareltjie hardloop tussen hulle en raak Sussa. “Jy is aan Sussa, whê phê!”
Sussa vererg haar want hy het sommer Miempie die afdraande af laat rol.
“Het jou, jou stouter,” Sussa stamp hom dat hy doer trek.
“Dis nie reg nie,”skree Sareltjie en begin huil.
“Tjank balie,” begin die ander meerkatjies te sing.
Skielik:”Grrrom,” uit Pappa se keel.
Al die kleintjies spaander om skuiling te soek by ouer meerkatte.
Miempie bewe van angs. Die grootmense staan op hul agterbene en snuif die lug.
“Vals alarm julle, dis net Jakkie Jakkals wat doer ver loop.”
Sjoe dit was ‘n benoude oomblikke. Mamma Meertjie soek in die grond vir iets om te eet.
“Toemaar Miempie, hier is vir jou ‘n stukkie geko wat nog oorgebly het.” Miempie vergeet van skrik en sit lekker en suig aan die geko.
Die kinders gaan aan met baljaar. Dit duik en rol en stoei.
Mamma en tannie Meertjie sit rustig met hul pensies oop sodat die sonnetjie dit lekker bak. Die babatjies lê in opgerolde bolletjies langs hulle.
“Tjieeer, grom, blaf,”kom dit van oom Meertjie.
Dit beteken groot moeilikheid. Kleintjies hardloop vir die huis se deur. Mamma en tant Meertjie agterna.
Pappa en oom Meertjie tree voetjie vir voetjie agteruit. Toe alger binne is, woerts die twee manne agterna. Oom Meertjie vee die sweet van sy voorkop: “Dit was so amper of daardie vervlakste valk het een van ons gevang.”
“Dankie kinders dat jul so vinnig gereageer het toe ek die noodsein gegee het,” oom Meertjie is sommer trots op almal.
Dit wys dat kinders moet luister as daar gewaarsku word en ouers moet kinders leer om waaksaam te wees. Gevaar kan van enige kant af kom.
Wanneer sy 24 maande oud is begin ‘n wyfie gewoonlik paar. Alhoewel meerkatte dwarsdeur die jaar kan paar, vind geboortes dikwels tydens die reënerige, warmer dele van die jaar van Augustus tot Maart plaas; dus wag meerkatte gewoonlik vir gunstige omstandighede voor hulle paar. ‘n Wyfie is elf weke lank dragtig, waarna sy geboorte gee aan 3 kleintjies. Wyfies kan tot drie maal per jaar kleintjies hê. Die kleintjies se oë en ore is toe met geboorte en hulle kan nie urineer of ontlas sonder stimulasie van hul ma nie. Die ore gaan na 10 dae oop en die oë na 10-14 dae. Hulle soog tot ‘n ouderdom van 49 tot 63 dae. ‘n Graatjiemeerkat is geslagsryp op 1 jaar en het ‘n moontlike lewensduur van 12 tot 13 jaar. Die vader neem soms ‘n aktiewe rol in die versorging van die kleintjies. Aangesien meerkatte ‘n sosiale karakter het, help nie-parende meerkatte dikwels ook om die kleintjies te versorg en van kos te voorsien.